ديوان الشاعر::: خلف الغريب :::

كل القبايل زاينت وعنزة وين؟؟=ما شفت بالساحة مزاين سباقه ؟؟
سألتني وافتيك يا بارد العين=اسمع من المسؤول زبدة مذاقه :
المجد ماهو في جمال البعارين=وطيب القبايل ما نقيسه بناقه
والمجد ما ينباع وسط الدكاكين=ولا هو على زين الشكل والرشاقة
المجد يا باغيه في خدمة الدين=في طاعة الله وابتعد عن نفاقه
والمجد في سنة ختام النبيين=نتبع هداه ولا نخالف وثاقه
والمجد باكرام الضيوف البعيدين=وكم حايل للضيف نرمي شناقه
والمجد باكرام الخوي لو بعد حين=ونرفا خطا الصاحب ولو كان عاقه
والمجد بتفقد حوال المساكين=والمجد في لمة وجيه الرفاقة
والمجد باوفاي العهد والعهد دين=يوم ان ولد اللاش قصر وباقه
والجار منزاله على الراس والعين=ولو غاب عنا ما هتكنا رواقه
والمجد يوم انه بكسب البعارين=كم ذود شيخ من يدينا نفاقه
ناطا وصوت الملح مثل البراكين=ليا ما نتخير بين ناقة وناقة
بالمعركة نقلب ثقيل الموازين=وكم فارس صارت حياته شفاقه
عقيل وان جات الحرايب مجانين=نهدر هدير الزمل وقت اصطفاقه
( عيال وايل ) لا تلاقا القبيلين=كم جيش قوم جيشنا الذرب عاقه
الكيل وافي يوم نقص الموازين=يفرح بنا اللي جاير الوقت ضاقه
جنود كسرى كسروها ( الشيابين )=واهدى لهم ( هاني ) من الموت باقة
لجت بنا اللي شافت الظلم والبين=يوم الردي ما له على الطيب طاقة
وما حد يصوت بالعشا للضعيفين=يا كود حنا والخلايق بفاقة
نعطي العطايا للبعيد وللادنين=والله كفل رزق الخلايق وساقه
عن ( السبيعي ) تم دفع الملايين=والسيف جا له من سببنا الاعاقة
شلنا الحمول الكايدة بين يومين=وسجين بعض الناس يبست ارياقه
واليوم في ظل الملوك الميامين=كل العرب عاشت بعز ورواقه
نعيش واقعنا ملوك وسلاطين=ونعيش ماضينا رجال العراقة
الزين هذا الزين يا طالب الزين=طيب الفعايل عاشقينه عشاقة
وياللي سألت وقلت وين المزايين=المجد هذا ما نقيسه بناقة

يا زمن وش باقي عنـدك مخفـى؟=ليش تعلن حرب وتوجـه قذايـف؟
ما كفاك تقـدم الضيـم المصفـى؟=ولا كفاك العيش في ظلم وكسايف ؟
وش بقا لي من بعد حـب توفـى؟=ما على الدنيا عقب موته حسايـف
كنت اخاف البعد لين البعـد لفـى=وبعدها : ماني من الايام خايـف..
يا زمن بالهون مـا سويـت كفـى=ماصبرت ايليـن فرقـت الولايـف
اشهد انـه بالرهـن كفـى ووفـى=واشهد اني رحت خسران وعايـف
اسحب اذيـال الهزيمـة ويتشفـى=وذقت مر الغبن من كاس الكلايـف
آه ياوقـت مضـا ياليـت غـفـا=ليت ما وقته مـع الايـام طايـف
لـذة الدنيـا ثوانـي مـا تكـفـى=وردة هبت بهـا ريـاح عصايـف
ولمعة شهاب سطع لحظـة وطفـا=وانطوت عني مثل طـي القطايـف
والامانـي زرعهـا قـوس وجفـا=لافهـا مـن لايـف الايـام لايـف
ول ياوقتك ليـا اعطـاك المقفـى=عقب ركب الكور تنـزل للسفايـف
تلتفت عن بعض شانـك واتخفـى=وتترك حقوقك لغيرك ..وانت شايف
والسيوف اللي بها الكيل الموفـى:=اصبحت عصيان ..ورماحي سنايف

عشنـا حكايـة حبـنـا واهتنيـنـا=وياما عطانا الوقـت لـذات وفـروح
نصبح وكنـا البارحـة مـا التقينـا=ونقضي ليال الحب ضحكات ومـزوح
اذكـر غـرام صـار غصـب علينـا=قلب تبع قلـب شـذا عطـره يفـوح
يامـا تخاوينـا و رحـنـا وجيـنـا=نمشي على كيف الهوا كـل مانـروح
نزعل ونرضى مـن بعـض لا بغينـا=ودوم الخطا بيـن المحبيـن مدمـوح
القلـب واحـد والهـدف محتويـنـا=واعرف نوايا خاطرك قبـل ماتبـوح
وحبل المحبـة منثنـي فـي يدينـا=قلب عشق قلب , وروح هـوت روح
وهبـت علينـا العاصفـة وانتهينـا=طاحت مباني الحب ..وانهارت صروح
لو كنت اعرف الخاتمـة مـا بدينـا=قصة علاقة ,,وانتهـت دم و جـروح

يا مهنة التعليم .. عزي لراعيك!=من اولٍ مهنة .. وتالي مهونة
دخل بك اللي جاهل في بلاويك=يحسبك راحة مير خابت ظنونه
سياتك اكبر يوم قارن حسانيك=بلشة من البلشات .. يالله بعونه !!
من قبل لا يدخلك شغله تماتيك=واليوم لازم للشغل ينتعونه
يعيش كل اليوم عيشة صعاليك=وبالليل مايرقد ياما يدهنونه
يصيح وسط المدرسة كنه الديك=حتى لسانه صار يكره سنونه
بين الفصول وبين الاشراف تحريك=يدور حتى تقلب الشمس لونه
ودفاتر التحضير مامنه تفكيك=الدرس لازم بالورق يكتبونه
صرنا تقل طلاب مافيه تشكيك=وزارته بالشرح ما يامنونه
امس العصر شاهدت ( بايع مساويك )=مبسوط!! بالتحضير ما يطالبونه
والا المعلم كل يوم وهو هيك=الصبح علة والمسا به صخونة
من شاف وجهه قال ماجور وش فيك=متجعدٍ وجهه وذبلت عيونه
والله ما ادري يا عرب ويش تاليك؟=خليتي العاقل تناقز جنونه!!

ما عاد باقـي لـك مشاريـه وعتـاب=مـا دام بالعشـرة عتـاب ومشـاريـه
( ان كان هذي فعلـة احبـاب باحبـاب=ما عـاد باقـي للعـدو مـا يسويـه )
ما ارضى بعيش الحب في شرعة الغاب=الله ولا عـشـق جـلـب ذل راعـيـه
شمس الغلا غابت ! وبدر الغلا غـاب !=يعنـي نهـار الحـب يشبـه لياليـه!!
اول اقـول: الهجـر عـادة للاصحـاب=لو ما يجينـي تالـي اليـوم لا اجيـه
اخفض جناح الوصل من باب الاعجـاب=ويخطي واعاتب مـن يحـاول يخطٌيـه
واقول : يا ما احلا خطا تلـع الارقـاب=واعد سيـات الغضـي مـن حسانيـه
لكن صحيت وكل غلطـة لهـا حسـاب=( بعض العرب لا تمونه تبتلـش فيـه )
يحسب سكوتـي ذل واعجابـي ارهـاب=فاهم غلط و( العقل من حـظ راعيـه )
وش جاب لين الحب للذل؟ وش جـاب؟=صحيح (كل إناء ينضـح بمـا فيـه )!!
روحي بدربـك جعلـه ورود واعشـاب=وانا طريقـي جعـل الازهـار تكسيـه
( لا انتي مثل نوت .. وانا ماني عقاب )=كلـن عسـى الله فـي طريقـه يهنيـه
لو ما بقا فـي كوكـب الارض جـذاب=بدري عليـك انكـس الـراس واحنيـه
عزي ومقـداري وراسـي وانـا شـاب=حتـم علـي مـن المـذلات لا احميـه
طبـع مـن الله , لا تطبـع ولا اكـذاب=( والسيل ماله غير سابـق مجاريـه )

اسهرت عين القلـم حتـى غفـى الدفتـر=وخيـل القوافـي تعـب خيالهـا الماهـر
السرج خالـي ومـات حصانـي الاشقـر=وغابت عن اسمـاع قلبـي دقـة الحافـر
السيف طايح عسى ماشر يـا ( عنتـر )=ماهـي عوايـدك تغمـد سيفـك الباتـر
من بعد ما كـان سيفـك باللقـا مشهـر=خاض المعـارك وعـود بعدهـا خاسـر
حبر القوافي نضب مـن بعـد مـا نـور=وبستـان الاشعـار ذابـل ورده العاطـر
سمعي قصر عن عتابك ليـه مايقصـر ؟=والعيـن دونـك يعـود طرفهـا الساهـر
لو حـاول يعاتـب الاحبـاب مـا يقـدر=اثـر الغـلا يتـرك القـادر ماهـو قـادر
اشوف مغربك مشـرق . وايمنـك ايسـر=واشـوف آخـرك أول . واولـك آخــر
صارت عيوبك مزايـا , والبـلا الأكبـر:=انـي اشـوف المزايـا عيـوب بالآخـر
قلب منحـك الغـلا والحـب مـا قصـر=ضمد جروحه وغنى ( لا متـى صابـر )
اغمـدت خنجـرك فـي شريانـه الابهـر=ونزعتها وانت فـي ليـل الجفـا سامـر
ما اطيعهم لو حكوا عن غـدرة الخنجـر=الغـادر اللـي طعـن بالخنجـر الغـادر
ملتك الاسفار مـن مهجـر إلـى مهجـر=متى تبطل عن الأسفـار يـا مسافـر ؟؟
يا ( قيس ) : طش الشداد و نوخ الضمـر=( ليلاك )خانت , وراحت مع ( بني عامر )

من عادتي لا قسى وقتـي تساهلتـه=ربي على الصبر بالشدات معطينـي
ومن عادتي لو يزود الحمل بي شلته=صابر ولا تشكـي الاثقـال متنينـي
الا مـن الثقـل ثقـل مـا تحملتـه=الحاجة الـي علـى مثلـك تودينـي
النـذل لـو ان جـدي جـد عايلتـه=عن حاجتي له رفيع العرش مغنينـي
برق على ديرة الانـذال مـا خلتـه=لو يثمر ورود واعشاب ورياحينـي
العـز طبعـي ولا عمـري تمثلتـه=من ورث جدي بكاس الطيب مسقيني
ادرس على يديه واجاوب على اسئلته=كذا قوانيـن وايـل هـي قوانينـي
واذا غدر بي رفيقي قلت : مشكلتـه=والضربة الـي ماتذبحنـي تقوينـي
ما اعامله لا تـردى بـي معاملتـه=لاني لفعل الردى مـا تقـدر يدينـي
كـذا اعرفـه دون اقنعـة مجملتـه=الاولـه فيـه وامـا الثانيـة فينـي
وان قال بي شين فيه الشين ما قلته=ذنبـه يكفيـه وذنوبـي تكفيـنـي
اخذت طبع النخل لـو مـا تطاولتـه=بالطوب يرمى وينزل تمـره الزينـي

سلام يا درة الامجاد والطيبه=واحلى تحية وتمجيده وترحيبه
يا مجمع العز يا بيت الفخر شامخ=يا شجرة في ذراها العز والهيبه
ياعيال وايل عساكم للبقا دايم=يا كعبة الطيب يا قبلة محاريبه
سلام من قلب شاعر واحد منكم=بدعت جزل القصيد وجيت بادي به
ما هو كثير لو امدح لابتي والله=يستاهلونه وكل الناس تدريبه
ان كان مايمدح اللي مثل هاللابه=يا آخر زمن وش بقى في جعبتك جيبه
ساس الفخر قبل ما يبعث رسول الله=والطيب يبنى على سابق مجاذيبه
تشهد لها الجن قبل الناس ما تشهد=فعل كما الشمس من يقدر يماري به
رقوا سنام المكارم واعتلو كوره=ذلول ما يتعب الركاب تدريبه
طاوعهم الطيب والله يعطي ويمنع=اطوع من السحب يوم الريح تقفي به
ترزمت واستهلت في مرابعهم=واثمارها العز والامجاد والهيبه
رجالهم ما حسب للنفس لو تذهب=من دون عزه كريم النفس يصخي به
المنذرية لجت بحصون ابن هاني=وعيا عليها ( ولد شيبان ) من طيبه
يقول كسرى عليه كسرة احلامه=ومن دونها راح كسرى ربحه الخيبه
شرب ثرى الارض من دمانهم واروى=وعظامهم مع هبوب الريح تومي به
بنوا من المجد صرح شامخ عالي=وفي غرة المجد مجد كنه الشيبه
وكل القبايل نعم من دون عانيها=كل العرب دون عانيها تعيي به
قبايل مدحها والله يشرفني=سجل لها المجد في زاهي مكاتيبه
وسلام في تالي القيفان ينصاكم=والورد والند ياخذ طيب من طيبه

صباح الثلج من دفء المشاعر ذاب في دربي=صباح يشبه شعور الاحبة عند فرقاهم
وأنا يالي تعبت ولاحصل من قربهم قربي=برودة هالمشاعر شبت النيران تنعاهم
بعد ليل سريته والنجوم البيض تسخر بي=تلحفت الظلام وقلت ياربي متى القاهم
اجر خطاي ودروبي خذتني دون مااشعربي=ومع باب الاماني الواسعة ذي جرة خطاهم
انادي واتلفت والرياح الهوج تغدر بي=واثرهم في الصحاري المجدبة شدوا مطاياهم
رفعت الصوت من جور الفراق وشدة الكربي=وزما رجم الجفا العالي واشوف البعد غطاهم
دقيقة قبل لا تفارق تمهل لي وناظر بي=سيوف الهجر في صدر المحبة وانزع اتلاهم
وش اسوي بحبك وانت خابر ما تخبر بي=وابي اسأل وين مقبرة الغوالي بادفن اغلاهم
تحياتي لحب غرد بسرب ما هو سربي=خلاص اقبل تعازي الشامتين وضحكة شفاهم
انا خليت وابل هالسحايب قبل تمطر بي=وانا عطشان لكن ماطلبت الري من ماهم
بعد ما كان حبي لك بدل زادي بدل شربي=نويت اصوم عن حب الحبايب و ارجع انساهم

لا تقاطعني ترا ما اقوا القطاعة=مد حبل الوصل والهجران خله
خانني قلب الشجاعة بالشجاعة=بعد هجرك صايبه خوف وذله
ما على الهجران يا الترف استطاعه=( والهجر فوق الثلاثة لا تحله )
ما اتحمل لو يطول الهجر ساعة=كيف لو قاطعتني باليوم كله ؟
ضاعت علوم الشجاعه والبتاعه=وحل بعد الامن خوف في محله
اولٍ ما للهوى سمع وطاعه=وبعد حبك سامعٍ له طايعٍ له
دام هو راعاك فانت اليوم راعه=وامسح الخط الحمر باوسط سجله
و هرجة العاذل ترا ما هي مطاعه=والسموحة واجبة لو جات زله
ارحم اللي لايع الحسرات لاعه=ولا يلام الخل لو ما شاف خله
عاشقك بالحب يملا كل صاعه=عاشقٍ لامن عشق : يعشقك كله
من عيونه , من فؤاده , من ذراعه=من ابهامه , لين هامه , لين ظله
جالبٍ صدقه على سوقك بضاعة=ومن صدق بالعذر .. عذره ينقبل له
( والخوي اللي يواخذ بالاشاعه=بعد مدة ما يخاوي غير ظله )
حط من دون الحسد سد ومناعه=و لا تسمع هرج واشي فيه خله
ومن رفع في عالي المركب شراعه=تقلعه صلف الهبايب عن محله
وما خسر من يمتلك كنز القناعة=والصحيح الموت.. والموت المذلة...

عارفك معجب بس ما تقدر تقول=يمنعك عنها كبر , مدري تجاهل
وانا لك الله : عنك مشغول .. مشغول=آصل مداهل..... واتحاشا مداهل
أصول في دنيا التجاريب ..وأجول=و أرد على ( هداج ) عذب المناهل
واذا حصانك طاح , ما نيب مسؤول=أنا حصاني فالميادين صاهل
مالي حدود ... وطولي أطول من الطول=وانظر إلى الموضوع نظرة تساهل
ساكن ببرج الشعر وفراشه زلول=وكم زرتني مرة وعودت ذاهل
اعطيك حق الضيف والحق مدبول=لا ضاق لي خلقٍ , ولا انضام كاهل
من يشتم ( ابو الهول ) ماضر ابو الهول=و ( فرعون ) عاهل بس ما دام عاهل
لكن على ما صار , خذ زبدة القول :=( انت امتجاهل , بس انا فيك جاهل )

النعم كايـد ولا ينطـال بسهولـه=كم واحد حاول يطولـه ولا طالـه
دربه عسير وفيه احراش مجهولـه=وان جزت واديه لازم تطلع جبالـه
والنعم حكم على الرجـال وفعولـه=ولا كل من قيل له والنعم يزها لـه
اللي يبا النعم لازم يسـرج خيولـه=ويصبر على شدته ويقاسي اهوالـه
يمشي على الشوك ما هابنه رجوله=ويسهر بعين ما هي للجـار ختالـة
بير عميق وتلقى الظاميـة حولـه=ولا يشرب الا هميم يدلـي حبالـه
اما كريم لضيفانـه ليـا جـوا لـه=يضحك حجاجه كفوفه وبل هطالـه
والا شجيع يدوس المـوت بنعولـه=يبيع عمره رخيص يـوم نـادا لـه
واليوم هم البنـادم ينقـل حمولـه=مستورة والجميع يعيش في حالـه
نعمه وامان ورخا في ظل هالدولـه=الله سترنـا وزاد الستـر بافضالـه
برعاية اللي كفوف الشعب تدعو له=كم دعوة في ظلام الليل تسعى لـه
وكم عقدة صبحت بيديـه محلولـة=وسحاب خيره على الاوطان همالـه
اللي يمينه على المعروف مجبولـه=يعيش ابو متعب الله يقبل اعمالـه
بحر الكرم واختلط مرجانه و لولـه=موجه عطا وين حاتم ضاع في جاله
واد من الغيث ما حد ينطح سيولـه=عز الشريعة و نصر الدين ورجالـه

صباحك من خزامى , من نفل , من شيح , مـن نـوار=بروض من مزون الوسـم الاول طالـت أعشابـه
صباحك فجر عاشق سامـر النجمـات بالاشعـار..=صباحك مبخرة من عـود جـاوة فاحـت اطيابـه
صباحك صبح خير , وجـو غيـم , وهلـت الأمطـار : =على ساحـل بحـر حـب الحبايـب هـل سكابـه
صباحك فرحة الشيـخ الكريـم بحضـرة الـزوار=تهلل نور وجهـه واختلـط مـع سيـل ترحابـه
صباحك فرحة العـود الكبيـر برجعـة ابـن بـار=شرب مر الزمـن والبهذلـة مـن سبـة غيابـه
صباحك فرحة اللي طال صومـه واقبـل الافطـار=نهاره صيف آب و وصايـم للفـرض فـي آبـه
صباحك ضحكة الطفـل الصغيـر بلعبـة المزمـار=مابين يبعثـر ألعابـه .. مابيـن يرتـب ألعابـه
تمنيت لصباحك كـل خيـر وجيـت لـك محتـار=على زورق ظنونـي , واليقيـن اشتالـت ركابـه
انـا سابـح بدوامـة لغـوز تحـيـر البـحـار=متاهة مـن متاهـات الغـرام , وعايـش بغابـة
سجين بمعتقل هجر الغوالي ضمـن نـاس كثـار=سجنته في غرامك طول عمـره دون بوابـه
فتح بيبان قلبه للضيوف وصـار لـه مـا صـار =غرامك , لوعتك , هجرك , وصالك , قال : حيا به
ذي ديارك ليا ضاقـت ببعـض العاشقيـن ديـار=تربـع فـي خفـوق مـن حيـاه يعاتـب عتابـه
مصيبة : لا تغلى اللي غـلاه بوسـط قلبـك نـار=و مصيبة : لو هدرت العمر خلف بـروق خلابـه
مصيبة : لا وقع راع المحبـة بيـن نـار وغـار=ومصيبة : لا دخل بيـن الحبايـب نـاس نصابـة
مصيبة : لو نزل قدرك بعين اللـي لهـم مقـدار=مصيبة : والمصيبة كم كريـم أخـلاق يبلـى بـه
( انا اظن الصدوق احسن لنفسه يقطـع المشـوار : =اذا ربـك بـلا هـذا الصـدوق بنـاس كذابـه )

ليت في درب الهوى قلبي عصاني=تجربة مرت عسى بالامر خيره
وش بلاني بالمحبة وش بلاني=ليش نام الناس وعيوني سهيره
ليش نار الحب شبت بالمحاني=من شرارة ولعت قلبي سعيره
حط مشهابه على القلب وكواني=وانثنى عني وانا يديني قصيره
مارحمني . ماتركني . ماعطاني=استميحه . واستجيره . واستثيره
صب حبه داخل عروقً تعاني =من هموم الوقت شداتً عسيره
هزني هز الزلازل للمباني=ولفني لف البحور المستديره
مالكً قلبي وحاكم في جناني=حكم ( أبو تركي ) على شبه الجزيره
وكن عينك لا ارسلت سهم ورماني=مثل رمح ( جديع ) في وسط الكسيره
وكن صدك يوم سليته وجاني=مثل سيف ( عقاب ) ينزع من جفيره
وكن رمشك يوم سلهم وابتلاني=رفة ( ابن مهيد ) عن حر الظهيره
وكن هجرك للحبايب لو تعاني=ردة ( الشعلان ) لصفوف المغيره
مصدر همومي ومنظومة جناني=مثل ( برجس ) منقع الموت وغديره
والدخيل الناس تعطيه الاماني=واذكر ( ابن سمير ) زبــن المستجـيـّره
ومنك أنا داخل عليك الموت جاني=مايصير انخاك وانت بدون غيره
فكني هالحين ماجاني كفاني=الهوى اولها .. وتاليها جريره
شلت من حمل المحبة حمل ثاني=وعادتي حمل المثاقيل الكبيره
ما تلفت ارتجي منه الحناني=شلت حملي واحتملته دون حيره
في بحر حبك غدت كل المؤاني=بين موجه ضعت وازعجني هديره
ياعقود اللول .. ياحب الجماني=ياعذاب القلب .. ياراحة ضميره
ياسعادة خافقي لو كنت جاني= ياسفيره .. ياوزيره .. ياأميره
ياقريب أبعيد .. ياقاصي وداني=حرت فيك من اليسيره للعسيره
رد لي قلبي وانا ماعود ثاني=أوعدك وعد انها مره أخيره
ليت قلبي قبل ماحبك عصاني=صح كانت تجربه .. لكن مريره

حييت يا راع البويضا ( سليمان ) =حييت من قلبي وعظمة لساني
ترحيبة العطشان في طش الامزان=وترحيبة الخايف بشوف الاماني
( هداج ) رحب فيك يا طير حوران=لو له سواني كان كز السواني
و ( تيماء ) ترحب فيك حضر وبدوان=في جيتك قامت تزج الغواني
وعيال وايل رحبوا يا كحيلان=ربعك بجياتك لهم شان ثاني
يا شيخ يا نسل المشايخ بليهان=يا نسل زيزوم الفعول السماني
جدك حصان المرجلة لو لها حصان=جدك عذاب الهجن شذب الاذاني
جدك نكاد القوم لا ثار دخان=لا شان بين القوم هرج اللساني
فوق الكحيلة كنها فرخ شيهان=سيف وفي يمناه سيف يماني
كم حلة يوم اصبحت دون عمدان=من ضرب فعل مضيعين التماني
( ساجر ) ويشهد له صديق وعدوان=اسقى عدوه من سعوط الجناني
ليث جمع فعل وكرم صدق وايمان=ريف لربعه بالقسا واللياني
راع البويضا يوم هي سنان وعنان=( راس اللبيد ) شاهده بالزماني
و( ذروات ) راحن كسب طلقين الايمان=ويفداك مالك يا ربيع العواني
هذي فعايلهم جزيلات وسمان=تاريخ يكتب بالذهب والجماني
ويلان نفخر كلما قيل ويلان=اهل المكارم من قديم الأواني
وانته بدرب الطيب عجلان عجلان=درب الجدود ولا لكم درب ثاني
والنعم والله كل ماقيل ( شملان )=روس الرجال ومتعبين الاواني
( المطرفي والبجيدي والمضيان=وحسني ) ما فيهم هبي وداني
سلقا من عمارات والفعل برهان=ضنا سهيل وللمكارم مباني
عيال وايل كنهم ضلع حوران=عز الضيوف وزبن خايف وجاني
وتم الجواب وكان بالقول نقصان=ارجو السموحة لو تزل المعاني

عـذابـي ياخـلـف شـوفـة ثـمـانـن كـنها الـيـاقـوت=مـع اللي ياخـلـف تـوقـد بجـوفـي مـن لهايـبـها
لغـمـهـا ياخـلـف سلكه على وسط الحشى موقوت=واخاف ان اللغـم يـقـبـس بجـوفـي مـن سبايبـها
اذا هاجت بي الذكرى رمـتـني في طـريق الموت=طريـحـن مـن بـواريـد العـساكر فـي كـتـايـبـها
طـيـوف الليل غـاراتـه تجـي مع سابقـات الصوت=وانا اللي ماهـقـيـت الـريـم تفـجـانـي حرايـبـها
مـواعـيـد الغلا كانـت ضحى ثالث بـروج الحـوت=وراح الحـوت والـمـيـزان مـاجـتـنـي ركايـبـها
وعذر الـزيـن برج الحـوت دايـم بالوعد مسحـوت=مواعـيــده شـكـى العـشـاق من جـمـرة كذايـبها
وقالت ثالث العقرب تجي فـي شـارع الحـتـحـوت=سـفـيـه اللي مع العـقـرب رجى شـوفـة حـبايـبها
اشوف الظلم والخافـق يعاني مـثــل عـاشـق نـوت=واداري خـاطر الغالـيـن وابـعـد عـن طـلايـبـها
اقاسي ياخـلـف رمـشـن سحـر قـلـبـي مثل هاروت=ترك روحي بوسـط الليل تـشـكـي مـن غـلايبـها
علاج الروح برمـوشـه واخـاف انـه يفـوت الفوت=ولا يشـفي صواب الـروح غـيـر عـلاج صايـبـها
لك الله ماهـقـيـت الـريــم برمـوشـه تشـوتك شوت=لما شفت الحشى تـومـي غـصونـه فـي هـبايـبـها
غدى جسمي من هـمـوم الـلـيـالـي ذابـلـن مـنحوت=تجـيـنـي مـن طـيـوف الـزيـن فـي ليلي غرايبها
تراني ياخلف وسط الهـبـايـب مـثـل غـصن التوت=فـزوعـك او دنـى يـوم الـمـقـابـر مـع نـصـايبها

دخيلك ... خل ميت الحب ثاوي داخل التابوت=وانا جثة غرامي من زمن , راكز نصايبها
ولا تشكي غرام من لهيبه ذقت حر الموت=ترا الشكوى على ( مجنون ليلى ) ويش ثايبها ؟
تبث الوجد يا ( الراوي ) وانا ادفن وجدي المكبوت=ابين من مشاعر نكبتي : معشار غايبها
بعد سافرت في رحلة غرام وحجزها مثبوت=ذهاب بلا إياب... ورحلته ماشفت آيبها
لعنود من بنات أم الغزيل مرتعة بخبوت=رعت عشب الفياض اللي حما الحاكم عشايبها
جمع فيها المصور كل زين , وخصها بنعوت=وش آصف ويش أخلي من وصوف طاب طايبها ؟
اشوف الورد في خده ..واشوف بشفتيه التوت=واشوف الصبح في ليل تدلى اعلى ترايبها
رعى الله عودها الغض النشاش و خصرها المنحوت=وعينٍ كلما لدت وانا اسبح في غبايبها
وريقٍ بز مطعوم الحلاوة واذهل البسكوت=مظنة ... والا والله ما شرهت الحـــق ركايبها
شريفة جد , عد بعــد , ما تنقاد للسربوت=حفظها الله عن يدين الخبيث : بحفظ شايبها
سلالة من يفكون التوالي طيبين الصوت=حديهم لا دعته المعركة ماقال : هايبها
شيوخ افعال , نسل ابطال , ماهي شيخة اهل بشوت=يهدون الصعايب والصعايب هم صعايبها
حوت خَلقٍ على خِلقٍ , كمال اخلاق , زين سموت=عذية عن سموم اهل الفساد وعن لهايبها
سبحت بحبها دربٍ حدرني وسط بطن الحوت=ولا ادري وش نهاية ما شبكني من نشايبها
اشوف ان العرب حلوا مشاكلهم على ( بيروت ) =وانا مشكلتي الصغرى عجزت القى طبايبها
قصفني في سكود ولا قدر يقواه باتريوت=وبنت ( تمثال نصر ) بخافقي وانكفت خايبها
وهذي ثامن سنين العذاب بسيله المفلوت=عجز سدي يقاوم ما تهملع من سحايبها
دخيلك لا تعذبني بذكرى فراقها لا اموت=بقي شعرة عن جنون الهوى والقى عقايبها

قصيدة للشاعر خلف الغريب ألقاها
امام صاحب السموالملكي الأمير فهد بن سلطان بن عبد العزيز امير منطقة تبوك
في الحفل المقام في مركز عردة التابع لمحافظة تيماء
بحضور عدد من الاعيان ومشائخ القبائل ورؤساء المراكز ومديري الدوائر الحكومية ..

سلام يا ركن الشمال و جبلها=ترحيبه من نور وجهك لها نور
نورت دار لاجل لقياك ولها=تنشد عن اللي يفتل الشور بالشور
يا مرحبا عد المزون وهللها=باللي ليا جا قدمه الخير منثور
تنثر يمينه خيرها في قبلها=يمين طيب وعانقت قلب مسطور
سحاب خيرك كل دارك شملها=وانبت بريضان الدهر ورد وزهور
حياك نوار الفياض ونفلها=والطلح والضلعان و الرمل والقور
يا طلة ما كل طلة مثلها=طلة وفا طلة كرم طلة النور
يا نسل زيزوم المراجل فحلها=اللي على هام العلا وثق الكور
صقر الجزيرة محتميها بطلها=حامي حماها عن عدو ومقهور
عقب الظلام اللي طويل نزلها=وعقب العنا والفقر والظلم والجور
يوم انتخى بنوره برت من عللها=وحطم بمصباح الهدى كل ديجور
وورث بداره من شهر واحتملها=صقور عز تورث بدورها صقور
كلن بعطفه ضمها واشتملها=واستكمل البنيان دور على دور
لين اصبحت درة عديم مثلها=فوق الكلام ووصفها غير مقدور
مزيونة تختال باجمل حللها=لو هي صحاري ما بها مروج ونهور
يقودها الصنديد عادل ميلها=ربانها لا صكت امواج وبحور
عبدالله اللي كل زينه بذلها=حكيم راي وبالملمات دكتور
كم قالة وصلت يديه وقفلها=واوقف برايه كل هارج وهاذور
وعضيده اللي لو تمايل عدلها=له وقفة يفرح بها كل معسور
سلطان شيخ المرجلة ما ارتجلها=وما خاب من له مثل سلطان مذخور
مواصفاته ربي اللي كملها=يعطي ويمنح ما احترا قول مشكور
للصاحب احلى من حلاوة عسلها=و الا على كبد العدو سم ومرور
الله يرده من ديار وصلها=لاجل الوطن زار البعيدين ويزور
والتنمية دارت سريعا عجلها=في كل بقعة طاري الخير مذكور
ما قرية غير التطور وصلها=احدث طراز اسكان وخطوط وجسور
نهضة صعيب ان العقل يحتملها=خيال لكن صار واقع ومنظور
وعمت حسانيها على غير اهلها=من كان جيعان ومن كان مضرور
طيارة الامداد والغيث ما الهى=جسر وصل لديار حيدر ولاهور
وجراحة الاطفال ماحد عملها=طفلين مشتركين بالبطن والزور
شاف العوافي عقب كايد عللها=جانا بطفل وراح باثنين مسرور
اعمال كلن شافها ما جهلها=ما تنحصي يا مير باوراق وسطور
وبلادنا فوق المتون نحملها=من دونها نمشي على كل طابور
ومطية الشيطان غير نعقلها=نبتة ارهاب و فرخت حقد وشرور
ما همنا طغمة تزايد زعلها=ما ضر ضلع طويق ما دار و يدور
تنوي فتن لاشك ربي خذلها=ورمح الفتن بيدين الابطال مكسور
وحنا مع العاهل سيوف نقلها=( عيال وايل ) دون حرماتها سور
وختامها عد المزون وهللها=صلوا على اللي بشر الناس بالحور

شكواي بالبرق والقيفـان مشفوعـه=للي بتيماء صنوف الطيب فـي داره
يمناه تطرد ظلام الجـوع بشموعـه=وطيبه مرابع محول الوقت بامطـاره
بيت الغريب بذار الطيـب وزروعـه=من فضل رب رفع طيبـه ومقـداره
دارن بها منقـع الفزعـه وينبوعـه=اسقت خلف من نبوع الطيب وانهاره
فيها بيارق هل الطـولات مرفوعـه=ريفن للاضياف مع سترن على الجاره
ويلان تطفي كبودن تشتكي جوعـه=يشهد لهم ماضي التاريـخ واخبـاره
فقير بأسمه غناة الخلـق بطبوعـه=وبالمجد ثروة بني وايـل ومعيـاره
حمولتن جعلهـا ماهـي بمقطوعـه=من شان تبقى زمول الناس واخياره
من شان طفلن يتيمن ضاق بدموعه=فرخن ضعيفـن ولا يغنيـه منقـاره
يلقى بهم راحة الخاطـر ومطموعـه=وعلاج كبدن شكت بالقيظ مصهـاره
هذا خلف صاحبن نمشي على طوعه=ونفـرح بمسيارنـا والا بمسـيـاره
بحدود تيماء صخى الدنيا ومشروعه=وحصن المراجل ينوش الغيم باسواره
مفاتح الطيب في يمنـاه مجموعـه=روضن وريفه جمع عشبـه ونـواره
اجواد قومن لدرب الطيـب مدفوعـه=وتشهد على طيبهم عبده وسنجـاره
ياشوق بنتن بنقش الملح مردوعـه=ريمن هنوفن بياضـه تقـل جمـاره
عين اشقرن يرهب الصيدات بطلوعه=اسرع من النـار بالبـارود لاثـاره
يمناه فيها رماح المـوت مشموعـه=كم صيدتن جاه في روضه ولا طـاره
صفقات كفه بجوف الخرب مسموعه=ظفره شطيرن حديدن تقـل سنـاره
تلقى الثنادي بوسط الروض مجدوعه=من مخلبن يطعن الصيده بمسمـاره
ومهرة عقيدن تبوج القوم وجموعـه=لاثار ثاير رصاص القـوم وغبـاره
لاصاح صايح نذير الخيل وفزوعـه=تدخل جموعن بقاعن ضاق معبـاره
يفداك عفنن يشح بنصف جربوعـه=لاشاف ضيفه تطيح الروح منهـاره
الصدر ضايق ووسط الروح مفجوعه=والقلب يرجي صليب الراي واشواره

هلا هلا وامتلا الخفاق وفروعه=ترحيب بالذيب والاشواق فوارة
( تيماء ) تهلي وتوقد حفلة شموعه=والليل مثل النهار وزاد بانواره
يا مرحبا عد صبح بان بطلوعه=وعداد كوكب بدا ونجوم سيارة
وعداد رمل , ووبل صب في قوعه=وعداد عشبه مع أشجاره ونواره
باللي نصاني قصيده واذهب الروعه=( عقد من اللول مجلوب بمحاره )
( سبايك من بنات الفكر مصنوعة=من بطن مهد الذهب جابوه تجاره )
امواج لا هاج شاطيها حسب طوعه=ما يقدر السير فيها كل بحارة
( فواز ) لا هاز صيد الشعر بطلوعه=مخلاب كفه تقول سيوف بتارة
يهوي ويدلي وياخذ منه مطموعه=والخرب حول وعاقه ضرب شنكاره
فواز يا حافظ التاريخ بضلوعه=ياخالط الدر والمرجان باشعاره
يا حي قافك ..عسى الجيات بتبوعه=لحيث نشفق على مثلك ومسياره
خوة رجال الوفا يازين طالوعه=وخوة هلوس الردا ياشين مصداره
الطيب اشفق على لاماه واجوعه=والعفن مسهوج لو هو باول الحارة
ارفع مقامي عن المسهوج واربوعه=واعز نفسي عن الهلباج وافكاره
ورفقتك عندي شرف , واروع من الروعة=ولرفقة الناس عندي فن واداره
بناية الصدق عندي غير مصدوعه=اتعب على ساسها واطول جداره
واذا نواها خبيث الساس بجموعه=يبطي عظم ما وصل من عالي اسواره
وسلعة صداقه صديقي غير مبيوعه=لو زود الطامع السوام باسعاره
في خزنة من حديد الترك مصنوعة=وفراشها من حرير ودونها ستارة
وبعض العرب تنتهي رفقته باسبوعه= زبدة وذابت وملح طاح في ناره
وشكواك بالقلب قبل الاذن مسموعه =شبت بوسط الضماير نار كراره
ان يسر الله لتشرب حلو قرطوعه=و ( هداج ) يروي ظما الظامي عن امراره
ابشر بعز يهز الخصم بسنوعه=وش الطلب ؟ قل : وانا ملزوم باحضاره
أضرب بكف على النوماس باتوعه=واجلب لك الروح ما راعيت لآثاره
المال والجاه لك مرهون وفزوعه =والقوة اللي تخض الخصم في داره
( بعيال وايل ) سنايد من هم ربوعه=اطرفهم اللي رقا في طيبه القاره
مير اعتبر حاجتك يالقرم مشلوعه=لو هي بوسط البحر لاجيب بحاره
وانا لو ازرع من الابيات مشروعه=ما جيت معشار معشارك ومعشاره
وهرج بليا فعل ما بان منفوعه=سحاب صيف سرا , ما هلت امطاره
( وان كنت غلطان فالغلطات مرجوعه=كم رامي للهدف ما صوب الشارة )

سهيل غاب .. وغاب من يرجي سهيـل=والوادي الظامـي مـن سنيـن ظامـي
لا تحتـري للسيـل يـا راجـي السيـل=دار جفاهـا السيـل مـابـه مقـامـي
يا ( شْعيل ) ما الومك من الحمل يا شْعيل=ومن شـال حملـك ظنتـي مـا يلامـي
( المشكلـة موقفـك بيـن المشاكـيـل=العذر عن بعـض المواقـف حرامـي )
الصبر عيب ليـا طفـح طافـح الكيـل=ليا صار مسماره علـى القلـب حامـي
وش فايدة لا قالـوا العالـم : ( حْليـل )=بعض الجبايـر هـي تعيـب العظامـي
واذا تفرعـن بالقطيـن اشهـب الذيـل=علـى القطيـن وساكنيـه السـلامـي
ودام الحمير اسعارهـا سـاوت الخيـل=وش فايدة كلمـة : عريـب العمامـي ؟
وان كنت ما تسكن علـى ضفـة النيـل=مالـك غنـى دون الرشـا والمقـامـي
وليا صـرت بيـن الغربلـة والبهاذيـل=اكفـخ بجنحـان السـعـد لا تنـامـي
اشهر وخل الارض ل(غـراب قابيـل )=ماعاد فيهـا مطمعـة يـا ( القطامـي )
مـادام لـك جنحـان لا تقبـل المـيـل=الـرزق مابـه دون بـابـه محـامـي
اشعـل ظـلام الليـل قنديـل قنـديـل=واعلن علـى يـدك انتحـار الظلامـي
وان شفت هالدنيا تبـي تميـل الشيـل=بعها على اللـي بـأول السـوم سامـي
وان شح نفط ( اربيل ) لا تقرب اربيـل=النفط في ( كركـوك ) زامـي وطامـي
مـن بعـد مـا ينبـاع برميـل برميـل=اليوم يهـدى فـي ( ولايـة ميامـي )
اذا ( تعـدى الفعـل ) حـظ المفاعيـل=وش حصل( اللازم ) مـن الالتزامـي*
حتى متـى تجترنـا ( كذبـة ابريـل )=وجروحنـا مـع كـل كذبـة دوامــي
وبالمال مـا ينقـاس طيـب الرجاجيـل=الطيب فـي خـوض البحـور الزوامـي
و أحدّ من ضرب السيوف المصاقيـل :=كريـم يدعـى مـع طـعـام اللئـامـي
و أشدّ مـن شلفـا عقـابٍ ومنديـل :=لئيـم تحـت يـديـه رزق الكـرامـي
واخـاف مـن سـود الليـال المقابيـل=تاكـل ايدامـي قبـل لا اكـل ايـدامـي
كثـر العلـل ماعـاد يحتـاج تعلـيـل=الـرزق مالـه عـن يديـن الحرامـي
والموجز ابلـغ مـن طويـل التفاصيـل=لا شـك خـذ بوحـي و زبـدة كلامـي

ليش اضيقها وهي اصلا ضياق=وليش اقصرها وهي عدة سنين
العمر لو طال يختم بالفراق=وكلنا عن هالحياة مفارقين
من قبل تاكل من الدنيا طراق=عيش عمرك ماانت عايش مرتين
لا تحسب للسمين وللدقاق=الدقاق يزول ويزول السمين
وانظر بقلبك شف احوال العراق=تقتنع لا شفت دار الرافدين
والهموم اللي على قلبك رواق=فلها بالصبر والذكر المبين
ما احد مع هالزمن سوا اتفاق=يوم عسر ويوم يسر ويوم بين
غامر بدنياك لو فيها اصطفاق=دلو ماء ودلو نص ودلو طين
ما يزيد الرزق كثر الاحتراق=ولا ينقص فيه حبك للثمين
ولايجي بالهم والا بالطقاق=ولا بحرقة قلب والا سهر عين
القناعة كنز طول الدهر باق=والطمع ضيع كنوز الطامعين
واللوازم ودها رجل حقاق=دون ستر الوجه لايمكن يلين
بس حاول مايجي دينك نفاق=وش حلاة الآدمي من دون دين؟

قال البجيدي والبجيـدي مايقـول=إلاّ الجزالـه والقوافـي شاهـره
سبحان من خلقه تزول ومايـزول=وأغلب عباده بالدعاء له ساهـره
الحق يزعل بس كرهـي للزعـول=اللي كتم صدقه ولا هـو جاهـره
كلّن يرى القول الحقيقي في نزول=والناس معظمها تجاهـه ناهـره
بعض الرجال يسب أصحاب الميول=لاكنّ في صدره يعكْـس لظاهـره
يقول قول ينرفـز كبـار العقـول=ويرسم حوادث من خياله ماهـره
روس المراجل ماهي بحال الذيول=والديّنه ماهـي بحـال العاهـره
واليا تضايق خاطري سقت الذلول=أنصى الذي بيت الكرام مْصاهـره
خلف خلف شيّال عسرات الحمول=نسل المكارم والمكـارم طاهـره
اللي ليا منّه بغـى شـيٍّ يطـول=حتى القصيده من ذكر بَه زاهـره
عز الخوي لامنّ خانتـه الحلـول=وشوق الهنوف اللي وصوفه باهره
معْه المشاعر قامت تصول وتجول=بالصدر سوّت زعزعه ومْظاهـره
وعبّر بها بنـدر وبنـدر مايقـول=إلا الجزالـه والقوافـي شاهـره

وكان هذا الصوت المتواضع ردا عليه :

ياحي والله واكرم براع الذلول=بالطيب اللي كل طيب حاصره
نسل الكرام الشم ذربين الفعول=الطيبين اهل العقول الباصره
جده وابوه من الطحاطيح الزحول=بجايدة وانعم بها من آصرة
قريت ما بين القوافي في ذهول=وجتني هواجيس الفواد محاصرة
الناس يا بندر بلش فيها الرسول=حتى اهل مكة مابهم من ناصره
لكن ولو تقصر سواليف وتطول=الطايلة ماهي سواة القاصرة
بالعقل والحكمة نميز كل قول=وكم واحد بالعلم فكره عاصره
ولااحد على فكر البشر ركب قفول=والناس معها عقول ماهي قاصرة
وطعم الحقايق مر ماهو بمعسول=والهرج شوك الكبد طعن الخاصرة
والناس تربطها العوايد والاصول=وبغداد تسهرها جروح الناصرة
واللي يحسب العرض قبل يشوف طول=قل له تريح غاد والعب باصرة
بريال خذ لك خبز وريالين فول=واترك قديم العلم هو ومعاصره
جنب دروب ما تبي شخص ملول=مادام غصنك كل واحد هاصره
والرجل يبقى زول والا شبه زول=دامك لا خاويته ولا انت مقاصره
وان جا على العاقل كلام من مهبول=احسن بدال الرد يبقى خاصره
وان خضت غبات البحر فابشر بـ(لــول)=بس انت خل القاصرة للقاصرة