مجالس قبيلة عنزة

مجالس قبيلة عنزة (http://www.3nzh.com/vb/index.php)
-   مجلس عنزة للموروث الشعبي (http://www.3nzh.com/vb/forumdisplay.php?f=7)
-   -   الملحمة الدهمشية (http://www.3nzh.com/vb/showthread.php?t=28986)

نايف عقيلي المجلاد 10-09-2008 05:51 AM

الملحمة الدهمشية
 
الى ابناء قبيلة عنزه الكرام والذين يفخرون بأمجاد اي قبيلة من قبائلهم
الى الباحثين عن تاريخ قبيلة الدهامشه
إلى ابناء قبيلة الدهامشه الكرام
الى كل دهمشي يحب تاريخه المجيد ، ويتشرف به
الى كل دهمشي أحب تاريخ اجداده العظام الذين سطروا اروع البطولات والتضحيات في شتى الميادين
وبنوا لنا تاريخاً ومجداً ناصع البياض نماري به غيرنا
فكان من حقهم علينا ذكر امجادهم وإيضاح دورهم وتاريخهم المجيد
ولو بشكل بسيط
وقد كنت منذ مدة ، أفكر في قصيده تحمل شيئاً من ذلك وفيها ومضات من تاريخنا المجيد
ولقد تحركت فينا هذه المشاعر بعد قراءتي لقصيدة أرسلها الاستاذ محمد بن مبارك القحطاني الى اخي الاستاذ زبن مهدي المجلاد
وقد ذكر الشاعر القحطاني منها هذا البيت :
الدهمشي حر(ن) يصيد السمينا ........... يشهد له التاريخ جيل بعد جيل
وقد وجدت ان من واجبي ان أبين بعضاً من مآثر هذه القبيله وتاريخها المشرف والذي نُعرف به بين القبائل

فكانت:
الملحمة الدهمشية

أرسلت قاف(ن) يا محمد سمينا = يا زين والله فيه بدع التــماثيل
ومدحت أبو ياسر كريم اليمينا = نسل الشيوخ اللي تضد المقابيل
ردّ الثّنا تلقـــاه بالغانمينــــا =والطيب يثمر في قلوب الـرجاجـيـل
هذي علوم جـدودنا الأولينا =وحنّا نورّثهــا لجــيل بعــد جـيـــــل
عدنان مع قحطان متقاسمينا=والطّيب وهبه والمراجــل تنافيـل
الخوف شك(ن) والشجاعة يقينا=والطيب زول(ن) والمراجل درابيل
ما هي غريبة يوم يطلع حدينا = افعولنا ابين من الجدي وسهيـل
دهامشه للطيـب متوارثيــنا = ستر الـعــذارى لابسات الـخـلاخيـل
فيهم نشــدّ حــزامنا ينتوينا = هم ذخــرنا عــند المـلمّات بالحيــل
فيهم سند لظهورنا اليارتخينا = يوم انها بالرمح والسيف والخيل
ياما بهم روس المعالي رقينا=عدوّنا من فعلـهم يجـرع الويــل
وعنهم تحمّلنا الأذى ما شكينا = وعنّا يدوسون الخطر والبهاذيل
حنّا اليا حِدّد جمــلنا رسينا = اليا طوحّت بنت الشـيـوخ الهلاليـل
واليا ضكّنا عدوّنا ما رضينا= ركضاتنا تبــري الكـبود المغاليـل
واليا حضبنا بالجمل وانتخينا = لو يجتمع جيش ابرهه صاحب الفيل
واليا وفا معنا صديق(ن) وفينا= نشعل له أطراف الأصابع قناديل
قـصيرنـا عدّه حدا والدينـا=نرعــاه رعـي عيـوننـا بالمـناديـــل
نبلّ كبد اللي وقف يحترينا=مثل السّحاب اللي تحرّى به السيل
تاريخنا في نجد يا جاهلينا = حتى العمى يقــراه ماهي تماثيــل
في ديرة الحايط بيوت(ن) بنينا = فيها لنا ربع وبساتين وانخيل
راحوا جميع ربوعنا به بقينا=يضوي لميع سيوفنا حالك الليل
تطحن رحانا من بغى يبتلينا = ونشبع طيور(ن) بالبراري مهازيل
بسعود شيخٍ(ن) عَـزّنا ما ولِينا= مجلاد خلّى ضدّنا يجرع الويل
شيخة عهد والعهد حق(ن) علينا=نِسْأل بها في يوم كشف التفاصيل
ظلم القرابه فجّر الغيض فينا = والجور يرِّث بالضماير ثواليـــل
كم راس شيخٍ يا بغانا رمينا=وكم طامعٍ فينا قليل المحاصيـــل
وراع النعوس مطوع المعتدينا =سوه على اللي يجهل الحق ويعيـل
حمدان شيخ(ن) قاسي(ن) مايلينا = حدد جملها يوم وقت المصاويل
والشيخ قاعد مزبن الخايفينا = في نجد سوّا من الفعايل تهاويل
نسرح ونمرح والله اللي يعينا = نجير ناس وناسٍ نمرس لها الويل
عينيك يا راعي قعود(ن) تبينا = نرضيك ونغضب عمّنا يا حصل ميل
في ظل شيخ(ن) للمراجل خدِينا =(برجس غدير الموت ذيب الرجاجيل)
ولو ندّنا ضيم الدّهر ما علينا = ميــر البلا يا جا من الـعمّ تنكيــل
إمامنا صدّق بنا المغرضينا = اللي يحوكون الشّرك والمحابيـــل
والله يلولا حشمته ما مشينا =بانت عقب ذلك جميع التفاصيـــل
وجينا على وضح النّقا يوم جينا = ناطا الخطر ما نتّقي بالدحاميل
نمشي كشاف وندحر المعتدينا = تدله بنا شقح البكار المداليـــل
واللي تعرّض دربنا له وطينا = تدري بنا العربان قبل المراسيل
من راس فرع الخرّ يوم انتحينا = مثل السّحاب اللي طرافه مثاقيل
قطعاننا ترعى بحدّ السنينا = تقطف ثمر عشب(ن) غدا له زغاميل
ومنه انحدرنا وانتوينا يمينا = باطــراف ديـرة كاسبيـن التنافيــل
وسرنا من الجهرا ثم انتوينا = لديرة بني خزعل عصاة(ن) مشاكيل
كم شيخ قوم(ن) مبطي له سنينا =متغطرسٍ ما يوفي الحق والكيل
يصيح صيحة من غدا له جنينا =من كفّ برجس متعب الهجن والخيل
قال الزناتي والزناتي فطينا =(برجس غدا من فوق ابا زيد بالحيل)
للحشر مايلقى لبرجس وزينا = ( الذل ماله وســـط قلبه مداخيل )
اعظم بطل في نجد ماله ثمينا =هذا الذي تقــراه بكتــاب مــنديـــل
ُثمّ(ن) عبرنا شطوطها ما هبينا = تدفع لنا راوه زكاة المحاصيــل
نمشي ولا نخشى عدو(ن) يجينا=وبالشّام جينا ربعنا سبيع ورويـل
وعدنا على الوديان ثمّ التقينا = بربوعنا اللي قبلنا شدّوا الشيـــل
صرنا عرب بالخير متكاتفينا =والشرّ يعْبا للـــوجـــيه المغــاليــل
اليا تجمّعنا معاهم غدينا=مثل الـجـبال الراســيات الـمثاقيـــــــل
بسعود راكان المدلّل هنينا = وتركي عضيده يا حصل بالدّهر ميل
وأخو هوى عقيل حبس الكمينا = الله !! لو جاله بعمره تماهيـــل
لأهل سلميا حط الاسلام دينا= وبّدل كــلام الـنمنمــه بالتهاليــــل
من حمص للفيحاء اليا شرق لينـا=ومن راس وديان المهنّا اليا الهيل
نرقد بها وقت الضّحى ممّنينا = هزّاع ما يرويه فيض(ن) من النّيل
أنا اشهد انه من اسود العرينا =اللي أخذ حقّه وزوّد على الكيـل
وجزّاع فوق المدح يا سامعينا = منهل كرم ماهو بكل المناهيـل
عــوق الـعــديم ومنوة الهاتشينا = صينيّته يفـني بها قرّح الـحيـل
لو شانت أيام السّنه ما يشينا = يسقيه ربّه من صدوق الهماليل
وسعران قاد جموعنا وارتكينا = صليب راي وبالمهمّات حلحيل
حر(ن) مخاليبه تقصّ الوتينا = اليا شهر ترجي العشا منه بالحيل
خلا المشوّك يشتعل له رطينا = يرمي على العدوان من نار سجّيل
نادى بظلّه غيرنا ما اودينا =وبعيــون عـــدوانه سوات السماليل
عشرين عام وفوقها ما انثنينا = ويعطيك غانم في قصيده تحاليل
حتى رضيع الديد يلحق علينا = ويصير رجل(ن) من حساب الرجاجيل
مرٍّ شرابه للعدوّ وان رضينا = ألذّ من طــعـم العـسل بالـفناجيـــل
صرنا " دويلة " والدّويلة لدينا = حدودها ما قاسها راعي الميل
العاصمة في كل أرضٍ تزينا = يا علّها الوسمي صدوق المخاييل
وأميرها منها وعنها وفينا =ما هو غريب(ن) شيّخته البراطيــل
وأبطالها ربع(ن) لنا ماهرينا=دهامشة يرسون وقت المصاويل
دستورها معروف للغانمينا = عون الصديق وللمعادي أبابيــــــل
دهامشة للطّيب مرسى ومينا = وعاداتهم قرط النشامى عن الخيل
الصبح حسّ نجورهم له دنينا = تفوح منها ريحة البنّ والهيــــل
وفي ظلّ أخو جوزاء رشيد احتمينا = شيخٍ ولا جت شيخته بالتهاويل
كم شيخ قوم(ن) يا تغطرس علينا = من ضربته يصبح سواة المهابيل
وليا كبرت القالة على الهيّنينا = يحلّها ما هي سـوالف وتطبيــل
للضيف يذبح كل كبش(ن) سّمينا = دايم مضيفه للنّشامى مداهيل
لو تسأل العربان في وسط سينا =عطوك عن سبع الضواري تفاصيل
للشيخ مهنا مالك الله نسينا=عند الحكـومـــه مثل الكل تمثيــل
كم من ضعيـف(ن) حسبة المعدمينا = أضحى غني بسبته ما بها قيل
يذبح لضيفه مكرم الغانمينا = والصبح ما بين الدواير تحاويـــــل
ونعم بكلّ أحفادهم أجمعينا = اللي على الشّدات دايــم حــلاليـــل
الشيخ أبو خالد حليم(ن) فطينا = خلفة راع الوضحا بعيد المواصيل
وعبدالعزيز ارشيد طلق اليمينا = شيخٍ ولد شيخٍ يضدّ المغالـيل
الكلّ منهم للجماعة عوينا=الله يوفــقــهـم طــريق التساهيـــل
(زبنه) عمود البيت قلب السفينا = هم درعنا الضافي وهم مقدم الريل
سد(ن) بوجه اللي بنا طامعينا = حضاة الجمل عند اكتراب المحاحيل
(وابن بكر) مذخور للمعتدينا .= يا كبرت القاله يجونك مصاويـل
يوم(ن) (اخو جحله) يقود الضعينا = جانا ولا رده بعيد المراحيل
(وضبيان) روس حرابنا يا مشينا =عند الملاقا يفعلون الافاعيل
ربع(ن) لنا لامجادهم خابرينا = (محلف) معاديهم تجيه الهرافيل
(وديادبه) لافعالهم ما كمينا =هم ريفنا يوم السنين المماحيـــل
ولفعل (ابن قنفذ) ترى مانسينا =وربعه هل العليا سباع(ن) قواتيل
ياجا (سلاطين) السعد فازعينا = ياكبرت القاله تعّود تساهيــــل
(وربعي جلاعيد) الفخر جاهزينا = يعدلّون مجنّب الحق تعديـــل
عز الرفيق لضيفهم مكرمينا = اهل الرباع المشرعه والمعاميل
(اولاد علي) بالضيق نعم المعينا=(صليلات) مركانا بالافعال والقيل
والقصر الاحمر شاهد لا حكينا = امجادهم ماهي سوالف وتضليل
اليوم ما هو أمس يا منصحينا = العزّ جمعة والـتّفرّق معــاويل
ومن قال حنّا بالعراق اكتفينا = مخطي ولا عنده لقوله دوالــيل
على حدود المملكة قاطنينا= نوب(ن) جنوب ونوب نرحل تشاميل
حنا سعوديين رحنا وجينا = نزكّي ولو كنا شـمال الطــريبيـــل
نطيع أمر ملوكنا ماعصينا =وناقف بوجه اللي عليهم مغاليل
يا برّدت نمشي على ما هوينا = وبالقيض نشرب من قراح(ن) شهاليل
واليا بغينا كلّ رزق(ن) شرينا = ولا انقطع عنّا أهل نجد واعْقَيْـل
باطراف حامر والابيّض رعينا = يا زين بأبو القور وقت التّعاليل
ويا قيل عرعر سال يمّه عنينا = بالجيش ولا فوق ظهر التّنابيـل
ويوم انتهى وقت البداوة بنينا = في دار أخو نورة تزود المحاصيل
راحت عداوات العرب والضّغينا=واللي بقلب الناس من بعضهم زِيل
اليوم وسط بلادنا ممنينا =وانا احمد اللي بدّل الوضــع تـبديـــل
الخير عمّ بلادنا واهتنينا=والدين غسّل كــل الاحقـاد تغسيـــــل
تاريخنا حق ولزوم(ن) علينا = يبقى على روس القبيله اكاليـــل
والحاضر اللي دون ماض(ن) حسينا =ماينفعك لو جمّلته التشاكيل
وختامها على النبي الأمينا = أزكى صلاتي مع سلامي وتبجيــل


محبكم
نايف بن عقيلي المجلاد

جمال اللميع 10-09-2008 06:01 AM

نـــايف بن عقـــيــــلــي المـــــجلاد


ماذا عساااني ان اقول عن هذه الملحمة الدهمشية



انني اشعر بالفخــــر حينما اتجول بين طياتها


اشم عبق الماضي الاصيل

والامجاااد التليده

وامضي قدما نحو حاااظر مشرق عنوانه ((اللحمه والتعاااضد))

صح لسااااانك يا ابا عقيلي

انني لـــ افخر بك ايما فخر واعتز بك ايما اعتزاز

يا شااااعر الدهامشة


تقديري

ابو لمار المضياني 10-09-2008 06:19 AM

ماشالله
 
ماشالله اخي نايف على هذه الملحمه , والله اثلجت صدري يابناخي

بهالقصيده العملاقه , انااا سعيد بك يا اخي ويشرفني التعليق على

هذه الملحمه .

والله وسبعة انعام بالدهامشه وبالجميع , وعنزه فخوره بك وبأخواني

الموجوديين في هذا الموقع الجميل جدا , ولك خالص تحياتي وتقديري

وتقبل احترامي الممزوووج بالفخر

فـــرج الدهمشـــي 10-09-2008 06:33 AM







شااااعر الدهامشة



نايف بن عقيلي المجلاد

الله يطول بعمرك وعساك على القوه يا أبو عقيلي

صح لسانك ملايين وبيض الله وجهك على هذه الشامخه


تسلم يمينك الملحمه الدهمشيه أفتخر فيها ووسام على الصدر بلا شك


لا هــــنـــــت ولا تحرمنى أبداعك

خالد الجعفري 10-09-2008 06:58 AM

صح لسانك اخوي المبدع نايف المجلاد ولسان شاعرها
ونعم بالدهامشة وشيوخها
بيض الله وجهك
تقبل تحياتي وتقديري،،،،،،،

راع الملحا الرباع 10-09-2008 09:21 AM

شاعرنا القدير نايف عقيلي المجلاد
وفيت لا هفيت بيض الله وجهك وكثر الله امثالك

بلغت من الابداع القمه
اطربت المسامع
الجمت الالسن

تقبل مروري
اخوكـ راع الملحا الرباعي

خلف الغريب 10-09-2008 01:38 PM

نايف المجلاد..

لا اعلم ماذا اقول ..؟؟

فعلا تترك الفكر حائرا امام الشاعرية الممزوجة بالحكمة والتاريخ ...

لله درك ولا هنت على هذا العرض الشعري الوافي الرائع ...

تحياتي لك وفعلا عز الله انها وسام على صدر كل دهمشي ...

تحياتي لك..

حمدان المطرفي 10-09-2008 03:26 PM

الغالي نايف عقيلي المجلاد


صح لساااااانك ملايين ولاتكفيك يابن العم ولافض فوك على الملحمه الشامخ

ونعم والله بعنزه كلها والدهامشه والفخوذ الأخرى وجميع القبايل


تقبل مروري


حمدان بن ربيع المطرفي العنزي

فهد المجلاد 10-09-2008 03:29 PM



http:///1.jpg

مفخرة لكل الدهامشة يابوعقيلي

ملحمة تعتبر مصدر فخر لكل دهمشي بوجه خاص ولكل قبيلة عنزة العزيزة بوجه عام

ملحمة مدعومة بالقصص والحقائق والتي تثبت لنا بشكل قاطع أننا أمام شاعر عملاق قادر
على عسف البيوت لأرادته وكذلك باحث ومؤرخ له معرفة واسعة واطلاع كبير في التاريخ
ومن المهتمين في تراث قبيلة عنزة بشكل خاص

الف صح لسانك يابوعقيلي على كل حرف من هذه الملحمة التي
تجبرك على قراءتها حتى آخر حرف


الله لايهينك وبيض الله وجهك يانايف



تقديري ومحبتي الصادقة ,,,



الساعة الآن 08:14 AM.

Powered by vBulletin Version 3.8.7
Copyright 2018 vBulletin Solutions, Inc. All rights reserved.

(( جميع الحقوق محفوظة لـ شبكة مجالس قبيلة عنزة))