المساعد الشخصي الرقمي

مشاهدة النسخة كاملة : قصة وقصيدة الامانة لرشيد بن معتق الرشيدي


ابراهيم حرير العنزي
27-10-2009, 10:02 PM
هذه قصة حقيقية حصلت لرشيد ابن معتق الرشيدي وهي تبين محافظة البدو على الامانة يقولون ان ارشيد راح مع جماعة من البدو الى المدينة سفر وهم يحملون السمن والشوف ومانتتجة البادية ليبيعونه في المدينة ويشترون مكانه ملابس ومايحتاجونه من المدينه وكانوا مجموعة من البل وارشيد ارسل معه جمل امانه وهو محمل ولاجاء من المدينه يشتري اللي وصوه عليه وكان مع ارشيد بارود وحين اوصلوا المدينة باعوا اللي معهم وشروا اللي يبونه ارشيد بن معتق قصر علية المال فراح باع باروده واشتراء باقي اغراضه ورجعوا الى البادية محملين وهم بالطريق تعب الجمل اللي مرسلينه امانه مع ارشيد وبرك وعي يثور فقالوا المجموعة اللي معاه خله ايولي وامش معنا الطريق طويل وحنا امحملين وقطاعين الطريق واجد امش وخله فقال ارشيد والله لونه لي تركته ولاكن امانه مااخليه ابد روحوا وانا اجلس عنده لين يرتاح والحقكم راحوا المجموعة وتركوه عند الجمل الامانه نام ارشيد من كثر التعب والسفر عند الجمل ماانتبه الا واحد واقف فوق راسه وحاط البندقية في راسه والاهو قطاع طريق قال له قم وجلس ارشيد بعيد عن الجمل واخذ يفتش حمل الجمل ولقى عسل واخذ ياكل من العسل وهو يتكلم على ارشيد وايقلط عليه وارشيد ماعنده اسلاح وهذاك مسلح لاحظ ارشيد ان قطاع الطريق اسلاحه نفس اسلاح ارشيد اللي باعه بالمدينة وفتش جيبه فوجد طلقة من البندق اللي باعها وقاطع الطريق امن ان ارشيد ماعنده اسلاح وياكل بالعسل فتقفها ارشيد واخذ سلاحه بسرعة وحط فيها الطلقة واحترس عليه قام قطاع الطريق وهجم عليه مثل الاسد لانه مأمن ان البندقية مافيها فشق فضربه ارشيد والا هو مكانه ميت فساق ارشيد الجمل وعاد الى البادية محافظا على الامانه فقال هذه القصيدة




سقت الجمل وسط الاخلي الاصاريم يوم الجمل عـي ايوصـل اوزانـه




وجاني اغلام من اخيـار الشغاميـم حلحيـل والله مابقلـبـه جبـانـه




وحلف وحولنـي بـزود وتحطيـم ورد الجمل والشيـل قطـع ابطانـه




بالحكي يعطينـي مسبـه وتشتيـم وحملت كل اللي طلع مـن السانـه




وخاطرت عقب الذل والقهر والضيم من دون حالي والجمـل والامانـه




ورديـت للـي مانعتـه المقاسيـم من بندق بعتـه ابماضـي زمانـه




قلت انحـرف والا علـي الملازيـم لتشوف كبدك تقـل حـب اسعدانـه




وقـف وراعانـي وحنـذت بتحريـم انـه لياصلنـي بـعـزم وتكـانـه




وعطيته اللي تقسم الجسـم تقسيـم بين ابهره والقلب صـار اطلعانـه




بمشبك خلـى مـع القلـب تنسيـم وعقب الكرامة ذاق منهـا الاهانـه




وعقب الشجاعة عض روس الاباهيم واقفيت وهـو واقـع فـي مكانـه

فهد الجعفري
28-10-2009, 05:41 AM
والله ونعم برشيد ونعم بربعه بني رشيد جيرة وخوه
تسلم على تدوين هذه القصة اللتي تحكي عن الامانة والاستبسال في سبيل الحفاظ عليها

سليمان الجعفري
28-10-2009, 09:40 PM
والله ونعم برشيد ونعم بربعه بني رشيد جيرة وخوه طيبه

تسلم اخي العزيز/ ابراهيم الفدعاني على نقل هذه القصة

الرااائعه وهي من عادات اهل الشجاعه والامانة

لاهنت ياالغالي تحياتي

ابراهيم حرير العنزي
19-11-2009, 02:27 PM
[quote=فهد الجعفري;538441]والله ونعم برشيد ونعم بربعه بني رشيد جيرة وخوه
تسلم على تدوين هذه القصة اللتي تحكي عن الامانة والاستبسال في سبيل الحفاظ عليها[


الاخ فهد الجعفري ماعليك زود وشكرا على الرد الجميل لاهنت
تحياتي والله الموفق

ابراهيم حرير العنزي
12-12-2009, 06:54 PM
[quote=سليمان العنزي;538638]والله ونعم برشيد ونعم بربعه بني رشيد جيرة وخوه طيبه


تسلم اخي العزيز/ ابراهيم الفدعاني على نقل هذه القصة

الرااائعه وهي من عادات اهل الشجاعه والامانة


لاهنت ياالغالي تحياتي

ماعليك زود وتسلم على الرد الجميل
تحياتي والله موفق

ابراهيم حرير العنزي
07-03-2010, 06:33 PM
شكرا لجميع الاخوة على الردود الجميلة
تحياتي والله الموفق

قويـت
13-03-2010, 03:20 PM
ربى يعافيك يا اخوى ابراهيم ع هــــ النقل
قصه أعجبتني تحمل الأصاله بين زواياها
وننتظر من صوبك كل مميز
تقبل مرورى

محمد السلطاني
14-03-2010, 05:36 PM
شكر لك على القصه الجميله

وسبعة انعام برشيد وبني رشيد

ابونايف الشداد
17-03-2010, 09:10 PM
يعطيك الف العافيه يابراهيم ..

على نقل هذه القصه الرائعه..

ونعم بقبيلة بني رشيد وهذه العادة الطيبه الذي يفتخربها كل رجل . لك تحياتي ..