المساعد الشخصي الرقمي

مشاهدة النسخة كاملة : اختلاف ابن سويط والدويش بلغز الخلاوي وحل بريك راعي بقعاء


فواز الغسلان
22-11-2007, 09:59 PM
في حدود عام 1195 للهجره نزل الشيخ فيصل ابن سويط شيخ الضفير


على بقعاء في وقت الصيف للقرب من الماء وبقي لمدة ثلاثة اشهر هي ايام الصيف 0 وفي البدايه كره

بريك راعي بقعاء او خاف بمعنى اصح ان يكون هناك مضايقه منهم لاهل الديره بسبب كثرتهم0

الا انه وبمرور الايام اكتشف ان ذلك الظن غير صحيح فقد وجدهم في منتهى الاحترام والخلق وعدم

التعرض لاهل الديره وممتلكاتهم كما نشأت علاقة صداقه قويه بينه وبين الشيخ فيصل ابن سويط كما

قال بريك:



حـنـا كـرهناهم ليالي ورودهم=واثريهم السكر بجوف حليب
تسعين ليله جيرة الشيخ فيصل=تقل ربع يوم مع احب حبيب
عسى طارشن قال السويطي مقفي=عسى ذلوله ماتدب دبيب

وعندما قرر ابن سويط الرحيل لم يخبر بريك وارتحل في الليل وعندما اصبح بريك وجد السويط قد

ارتحلوا وكل

راعي ذود عقل بكره بمراحه لراعي القليب اللي كان يسقي حلاله منه0

تضايق بريك وخاف ان رحيلهم ليلا بسبب اذى او اهانه من واحد من اهل الديره فأرسل اخاه خميس في

اثرهم

فلما وصل لهم قال ابن سويط اخبر بريك ان وجيههم مثل بياض الشاش ومادفعني لذلك الا كراهية

دموع الفراق

فرجع خميس واخبر بريك فقال بريك قصيدته المشهوره ومطلعها:



شربك قراح الماء مع الناس عيشه=وشمك هبوب الريح والشوف قايد
وقرب حـبـيـبـن من حـبـيبن يسرني=والبـغـــض هـذا مـن مـناه الـبـعــايد
عــساك يادارن تـــلــم الـــمـرشـــد=تــهــل عــلـيــك المـرزمات الرعــايد
على وجــه شــيـخن من شيوخ المرشد=لـهــم بـمــيــلات الـوهـيد العوايد

وهي طويله 00

وبعد سنتين جلس الشيخ فيصل بن سويط مع الشيخ الدويش شيخ مطير (ولاادري بالضبط ايهم)

فتذاكروا الوفاء عند الرجال وتذاكروا قصصهم الماضيه00

وجاء الذكر على وفاء الخلاوي عندما اطلق الظبيه لانها تشبه عيون ميثاء عشيقة صديقه منيع بن

سالم الذي وصاه انه مايذبح العنود الرباع الغنجاء اذا لقاه لانها تشبه ميثاء عشقته00

وفعلا استطاعت الشباك التي وضعها من اصطياد عنود تحمل هذه المواصفات وكان جائعا جدا فذكر

وصاة صديقه واطلقها00

ذكرها الخلاوي بقوله:


يقــول الخــلاوي والخــلاوي راشـــد=هرج الفتى وافــق قـريـض البتايع
يامــبــلـغــن مــنــي منــيع بن سالم=قــديــم الـــســبايا والجيوش القوالع
قل حبايلي صادت عـنـودن من المها=رباعــيــتــن مــن سايــلات المدامع
ريـمـيـتــن مادوهجـت باوسط الـقـرى=ولاحـفــرت باظــلافــهــا بالـمـنــاقع
ولا جــرها حــر الـظــماء صـوب منهل=وخــيــم تـدوه فــي جـبـاه الضفادع
ولكــنـهــا مـن ملـعــب الـريـم قــادهـا=بالاقــدار جــذاب الـبــروق اللوامع
هـــوا ظــلـفــهــا فــي كـفــه قـربــت له=مـدانـاة عــيــدان الـثــمام المـنايع
وجــذبـت لـهـا مــن محزمي هــوشريه=على حــدها ياتي دم الجــوف ضايع
وذكرت وصاتـــن من منـيـع بــن سالم=وغيري اليا من جاع ينسى الودايع
حـلـيـة ميـــثـاء يالـصــلـيـــبـي خــلـهــا=لـو كـنــت بايـام الـصـفــاري وجايع
وتـركـتـهــا لـعــيـون ميــثــاء طــلـيــقه=عـتـيـقــة صلـيبي(ن)طويل المذارع


الى قوله في القصيده عندما قال انه ربما ياتيها وحش وياكلها ( الظبي) فقال في وصف الوحش هذا:


تلـقــى بها كل الوحوش كما انها=تلاقـي بـزمات الـربـيـع النجايع
قليل قذى الاعيان لاناش نوشه=من الزاد معتاشن بها غير شابع
يقـعــد بـهــا يومــيــن والا ثلاثه=وخـطــرن بها يقعد الى يوم رابع

فقال ابن سويط هذا قصده الذيب وقال الدويش لا هذا قصده الطير 0 فتراهنوا من فرسي لفرسك

واختاروا بريك

راعي بقعاء يكون الحكم00

وهو الطير على كلام الدويش والسبب كلمه وحده وهي ( قليل قذى الاعيان) يعني الوسخ بعينه قليل

وهذا ينطبق

على الطير وليس الذيب0

وعندما جاء المرسول لبريك عرف ان فرس صديقه ابن سويط راح ياخذه الدويش فلجأ الى خطه ماتضر

الجميع وهي تنجي صديقه ابن سويط فقال للمرسول باقي بيتين من الوصف وهن :



قليل قذى الاعيان لاناش نوشه=من الزاد معــتاشـــن بها غير شابع
يقـعــد بـهــا يومــيــن والا ثلاثه=وخـطــرن بها يقــعــد الى يوم رابع
محنوني كالقوس من مهرفن به=شجاع من بعض السباع الــهــلايع
عشاه دم الجوف في ليلة الدجى=وشربه من جال الحوض يلقاه ناقع


وهكذا صار الوصف ينطبق على الذئب ثم قال للمرسول امسك بن سويط واهمس باذنه وقل يسلم عليك

بريك راعي بقعاء ويقول لاتاخذ فرس الدويش تراها بوجهي00

وفعلا فهمها ابن سويط وفهم ان الحق مع الدويش وان فرسه ماتحل له وان بريك فعل ذلك فزعه

لصديقه علشان يفك فرسه 00

وطبعا بعد اسبوع عجز يصبر ابن سويط وهو يعلم الدويش وقال هذي فرسي خذها لان الحق معك انت0

فقال الدويش مدام بريك قال ان فرسي بوجهه ؟ اجل انت فرسك بوجه بريك عني والله ماتجيني الفرس

يابن سويط0000000


رحمهم الله جميعا على هالسوالف الحلوه اللي توسع الصدر000

الاطرق آل هذال
23-11-2007, 01:47 AM
فواز الغسلان

الله لايهينك يابو فهد

وسعت صدورنا بسوالف الرجال الغانمين

الله يرحمهم ويسكنهم فسيح جناته

تسلم وتدوم يابو فهد وألف شكر لك

تحيتي وتقديري

§فايز الدهمشي§
23-11-2007, 02:00 AM
الله يرحمهم جميع
الله لايهينك على هالسوالف والقصيد اللي توسع الصدر
تسلم يالقرم
لكـ أطيب التحايا

خيّال البويضا
23-11-2007, 07:36 AM
يعطيك ألف عافية

أحمد الهويدفي
23-11-2007, 10:09 AM
لاهنت على هالسالفه الزينه ...

سبحانه مليانه وفاء وذكاء وسرعة بديهه وفطنه ....

والله يأخوان أن الأولين سوالفهم تطرب الراس...

شكرا فواز الغسلان .